|
 Հոկտեմբերի 10-15-ը Մարոկկոյում կայացավ Դատավորների միջազգային միության 52-րդ տարեկան համաժողովը: Համաժողովին մասնակցում էր նաև ՀՀ դատավորների միության պատվիրակությունը, ի դեմս միության նախագահ Հրաչիկ Սարգսյանի, գործադիր տնօրեն Վահե Ենգիբարյանի և միության անդամներ Վարդան Ստեփանյանի, Էդվարդ Մանուկյանի, Աղվան Պետրոսյանի, Գագիկ Խանդանյանի: Համաժողովին մասնակցում էր նաև ԵԱՀԿ երևանյան գրասենյակի ներկայացուցիչ Մարիա Սիլվանյանը:
Հաստատված օրակարգի համաձայն` համաժողովի առաջին օրը տեղի ունեցան տարածաշրջանային չորս խմբերի` Եվրոպական, Լատինաամերիկյան, Աֆրիկյան, Ասիական, Հյուսիսամերիկյան, Անտլանտյան հանդիպումները:
ՀՀ դատավորների միության պատվիրակությունը մասնակցեց Եվրոպական խմբի աշխատանքներին, որտեղ օրակարգում ընդգրկված էին հիմնականում աշխատավարձերի, դատավորի թոշակի և այլ ընթացակարգային հարցեր:
Հոկտեմբերի 12-ին տեղի ունեցավ համաժողովի պաշտոնական բացման արարողությունը, որի ընթացքում ելույթով հանդես եկան Մարոկկոյի Արդարադատության նախարարը, Գերագույն դատարանի նախագահը, Գլխավոր դատախազը, ինչպես նաև Մարոկկոյի դատավորների միության նախագահը:
Այնուհետև սկսվեցին չորս ուսումնասիրող հանձնաժողովների աշխատանքները` "Դատական համակարգի անկախության օբյեկտիվ և սուբյեկտիվ չափանիշների հայտնաբերումը և դասակարգումը, առևտրային վեճերով վարույթները, հաղորդակցման իրավունքի սահմանափակումը և դրա միջամտությունը անձնական կյանքին, կարիքավոր և տարեց աշխատողների հավասար հնարավորությունների ապահովումը" թեմաներով:
ՀՀ դատավորների միության պատվիրակությունը մասնակցեց առաջին ուսումնասիրող հանձնաժողովի աշխատանքներին, որոնց ընթացքում քննարկվեցին դատարանների անկախության հիմնախնդիրները,  մասնավորապես` Հայաստանի Հանրապետության օրինակով ընդգծվեց դատավորի աշխատավարձի նվազեցումը բացառող նորմի առկայության անհրաժեշտությունն օրենսդրության մեջ որպես դատարանի անկախության ապահովման կարևորագույն գործոններից մեկի: Քննարկվեցին նաև այլ հարցեր:
Կանոնադրության համաձայն` ուսումնասիրող հանձնաժողովների ղեկավարներն իրենց հաշվետվությունները ներկայացրեցին ընդհանուր ժողովի քննարկմանը, իսկ աշխատանքների արդյունքների վերջնական ամփոփումից հետո կընդունվեն համապատասխան որոշումներ:
ՀՀ դատավորների միության պատվիրակությունը` որպես Դատավորների միջազգային միության լիիրավ անդամ, մասնակցեց նաև ընդհանուր ժողովի աշխատանքներին, որոնց ընթացքում քվեարկության արդյունքներով Թուրքիայի և Ադրբեջանի դատավորների միություններն ընտրվեցին որպես Դատավորների միջազգային միության արտակարգ անդամներ: Քվեարկության արդյունքներով մերժվեց Ղազախստանի դատավորների միության առաջարկը Դատավորների միջազգային միության արտակարգ անդամի կարգավիճակից լիարժեք անդամի կարգավիճակ ստանալու վերաբերյալ:
Որոշվեց նաև Դատավորների միջազգային միության 53-րդ տարեկան համաժողովի անցկացման վայր ընտրել Սենեգալը: Այսպիսով` Դատավորների միջազգային միության հաջորդ` 53-րդ տարեկան համաժողովը կանցկացվի Սենեգալում:
|
